*@*تــــــــــــنـــــــــــــــــــــاســـــــــا نــــــي*@*

[mf$hm]

وش لونكم<<<< انا عنابي
الصراحه أنا أول مرة أشارك في هذا القسم

إذا لقيت ردود بحط القصة

[mf$hm]

>>>الرواية<<<
تـنـــــــــاســـــــــانـــي
للكاتبة: ღقـوتღالقلـوبღ


الجزء الاول

نبدا بسم الله ،،...
،،

نبدا بالجد اللي بالعائله اللي هو ابو محمد .. و هو متوفي ..
وكان متزوج حرمتين .. اللي هم ام محمد وام سالم ..

اولاد ام محمد
محمد = ابو عمر 52
ناصر = ابو عبد الله 50
ام ساره = 45

اولاد ام سالم ..
سالم = 50 ابو مازن
ام مريم = 40
سعيد = ابو حمزه37

ام محمد وام سالم ساكنات مع ابو عمر وعائلته .. لان ابو عمر ساكن ببيت ابوه ..
وام سالم كانت حابه تكون ببيت زوجها حتى ولو هو ميت.. وابو مازن يكون جارهم ..
وعلاقت ام محمد وام سالم ماشي حالها .. رغم انهم احيان يختلفون .. الا انهم من بعد وفاة ابو محمد ابتدن يحبن بعض ..

ابو عمر عنده من الاولاد .. عمر 26 سنه .. عبير 23 سنه .. ريم 21 .. اريج 19 .. وأخر العنقود اشرف10 سنين ..
وابو مازن عنده .. مازن عمره 27 سنه ومتزوج بنت عمته ساره .. واحمد 26.. تركي 24 .. ترانيم 21 و رغد 19 سنه ..
ابو عبد الله اولاده هم .. عبد الله 28 سنه متزوج وعنده ولد اسمه اسامه وعمره سنتين .. وبعد عبدالله انرزق ناصر بتوم اللي هم بـاسم وبـاسل 25 سنه .. ما يتشابهون بالشكل كثير مثل باقي التوائم .. بس عندهم نفس الاطباع .. وبعدهم تجي تغريد 21 سنه ..
و سعيد عنده حمزه 11 والعنود 5 سنوات ..
ام ساره عندها ساره 24 سنه وعماد 22 سنه ..
و ام مريم عندها مريم 19 سنه و سحر 16 .. و الصغير محمد 3 سنوات ..

اكثر شباب العائله يشتغلون بشركات اهلهم وتركي بس اللي يدرس للحين ..وسعيد محامي كبير وشغله ماشي ..

.......،،،، بـيـــتــــ ابــو عــمـــــر ،،،،........

كانت اريج قاعده بغرفتها تتأمل صورها وهي صغيره .. اريج تحب ترجع لطفولتها كثير .. كان عندها قدر كبير من الجمال ولا زال ..والبرائه ماليه وجهها .. وكانت ابتسامتها كثير حلوه ..
اريج هي الاحلى من بين اخواتها وبنات العائله .. و رغم انها الصغيره ما كانت دلوعه كثير..
.... سمعت اريج صوت جدتها تناديها..من بره الغرفه.. ام محمد: اريـــــج .. يـــا اريـــج ..
اريج وهي تفتح باب غرفتها و تبتسم لجدتها : نعم جدتي ..
ام محمد : اقول يمه انزلي تحت .. الكل مجتمعين والبنات كلهم موجودين ..
اريج : حاضر يالغاليه .. شوي وانزل ..
نزلت ام محمد و بعدها نزلت اريج ...
اريج : السلام عليكم ..
الكل : و عليكم السلام .. هلا ارووجه ..
بعد ما سلمت اريج قعدت معاهن .. و قعدو الحريم يسولفون .. و اكيد مثل كل مره يجتمعون فيها على ضحك و سوالف طول الوقت ..

وبالجهه الثانيه من المجلس و بعيد عن باقي الحريم ..
استغربت عبير هدوء ندى مو من عادتها تكون بهالهدوء ...
سألتها عبير بصوت واطي :ندى خير انشالله .. حصل شي بينج و بين عبدالله ..؟
ندى : لا .. بسم الله علينا .. مافي شي ... ليش تسألين ..؟؟
عبير :زين ليش من اول القعده وانتي ساكته ..؟؟ لازم يكون حصل شي معج ..
ندى : ولا شي .. بس احس اني تعبانه شوي ..
عبير : طيب .. سلامتج ..

ندى هي زوجة عبدالله اللي هو ابن عم عبير .. ندى عمرها 22 سنه ..
ندى وعبدالله تزوجو عن حب .. من 3 سنوات ... عبدالله يحب ندى بشكل جنوني ... عادتا الحب ممكن يقل بعد الزواج .. الا انه عبدالله كان يحب ندى كل يوم اكثر من اللي قبله .. و كانو متفاهمين .. و حياتهم سعيده .... بس بالفتره الاخيره ندى تغيرت .. ما عادت تهتم ببيتها وزوجها مثل اول .. والسبب هو ادمانها ع النت .. وبالأخص الشات ( الدردشه ) اللي صايره تقضي كل وقتها فيها .. بالأول كان تضيع فراغ بس الحين تغير الوضع ..
عبير صديقة ندى من قبل ما تكون زوجة ابن عمها .. و قريبه منها كثير ..و هي تعرف ان ندى تدخل دردشه .. و كانت تنصحها كثير وتقول لها ان الدردشه ياما خربت بيوت .. وعبير تعرف ان عبدالله ما راح يرضى ان زوجته تكلم شباب.. سواء كان بالنت ولا بغيره.. مثل باقي الرجال اكيد .. بس ندى ما كانت تهتم لنصايح عبير ..

ام عمر : عبيــر .. نــدى .. تعالو اقعدو معانه ...
عبير : اوكي يمه .. جايين ......
و يروحن عبير و ندى و يقعدون مع الباقين ..

ام مازن : ام ساره .. اليوم اتصلو فيني مازن و ساره .. يقولون انهم بيرجعون يوم الأحد من السفر يعني بعد 3 ايام ..
ام ساره وهي فرحانه من قلبها و متفاجئه : جـــد ..؟؟!!و ليش ساره ما اتصلت فيني و خبرتني ..؟
ام مازن : قالت انها بتتصل فيج المسا بعد ما ترجع من المستشفى ..
ام ساره : الله يرجعهم بالسلامه .. و يبشرج بالخير انشالله يأم مازن ..والله انج فرحتيني ..
ريم : صحيح شلون العلاج معاهه ..؟؟
ام مازن : تقول ان الاطباء عملو اللي عليهم .. والباقي على الله ..
الكل : ونعم بالله ..
تغريد : الله يرجعهم بالسلامه ..

ساره ومازن متزوجين من اكثر من 5 سنين .. هم الاثنين طيبين .. و مناسبين لبعض كثير ..
بس مشكلتهم انهم للحين ما عندهم طفل .. و لهالسبب هم مسافرين .. لحتى يلاقون علاج لساره ..

دخل عمر يبي يسلم على عماته ..
عمر : السلام عليكم و رحمة الله و بركاته ..
الكل : و عليكم السلام ..
ام محمد : هلا والله بولدي عمر ..
عمر : هلا فيج ياالغاليه ..
ام ساره : شلونك عمر ..؟
عمر : بخير الله يسلمج .. شلونج انتي ..
ام ساره : ماشي الحال ..
وسلم عمر على كل عماته .. و كان كل شوي يناظر بنت عمه تغريد ..
ترانيم غمزت لتغريد ..لان الكل انتبه لنظرات عمر الا تغريد ..
قبل ما يطلع عمر .. و هو عيونه على تغريد : شلونكم يا بنات العم ..
استحت تغريد من نظراته رغم انها مو عارفه سببها .. و ردت مع البنات ..: بخير ....
وطلع عمر ..
ترانيم اخذت تغريد على جنب و هي حابه انها تغيضها وقالت لها وهي تغمز : شو هالنظرات اللي بينج و بين عمر ..؟
رغم انه ترانيم كانت عارفه انه تغريد ما تدري عن شي .. بس كانت تبي تحرجها ...
استحت تغريد وهي ترد عليها .. و كانت تحاول انها تبرر .. بس ما تعرف : اي نظرات .. اصلا انا ما شفته .. كنت طول الوقت عيويني بالأرض ..
ترانيم : اي بس اللي ما كانت عيونه بالأرض شاف عمر شلون كان يطالعج ..
تغريد : كان يطالعني انـا ..؟؟
ترانيم : تبيني تفهميني انج ما تدرين انه يحبج ..؟
تغريد : اي حب يالخبله ..؟؟ كبرتي المسأله من نظرات لحب ..؟؟!!
ترانيم وهي فاجه عيونها : لا تقولين انج اخر من يعلم ..؟؟ الكل صار يدري ..
تغريد : شو اللي صار الكل يدري عنه ..؟؟
ترانيم : انه عمر يحبج ..
تغريد : انتي شقاعده تقولين ..؟؟ اكيد صار شي لعقلج ... عمر يحبني انا ...؟؟!!
ترانيم : انا اقرب وحده لج وما تخبريني عن هالحب ...... كملت ترانيم وهي تهز راسها : ما اقول غير حسافه ع الصداقه والقرابه اللي بيننا
تغريد احتشرت وصارت تبي تبرر بأي طريقه : ترانيم .. لا يكون اللي قاعده تقولينه من مقالبج الماصخه .. ترا والله ما ادري عن شي من اللي تقولينه ..
ترانيم : يالخبله شلون ما تدرين انه يحبج .. واحنا كل ما تجمعنا .. من دون كل شباب العايله يجي هو ويسلم .. واذا كنتي حظرتج مو موجوده ما يجي يسلم ولا كأنه يعرفنا اصلا خخخخخ .. ونظراته الغريبه .. لا تقولين انه كل هذا ما كنتي منتبهه له .. لا وهذا كله غير تلميحات ريم لج ..
تغريد : والله اني خبله من جد .. كل هذا وانا مو حاسه ... وانتي ليش ما خبرتيني لما شفتيني دلخه وصعب افهم ..
ترانيم وهي تأيد تغريد: تصدقين انج اول مره تقولين شي صحيح.. انا من زمان اقول انج دلخه وما تفهمين.. بس ما كنتي تصدقيني ..
تغريد : انطمي .... بس والله شي غريب انه يحبني .. ما عمري تصورت ان عمر ممكن يحب ... مدري ليش ... احس انه عصبي و ما يعرف يحب ... طلع يعرف ... لا ويحبني انا بعد ..!!
ترانيم : ههههههه مالت عليج مسويه للحبيب صورت وحش خخخخخخ و يلا عمري دامج عرفتي خلينا نروح نقعد مع الحريم ..
تغريد وهي للحين متفاجأه : زين يلا امشي ...
و راحو ترانيم و تغريد وقعدو مع باقي الحريم... وبعد شوي كانت ندى تبي تروح ..
ندى : يلا انا اترخص ..
ام سالم : ليش يا بنيتي ..؟؟ ما صار لج ساعه من جيتي ..
ندى : والله يا جدتي لازم امر اختي اجيب من عندها اسامه .. لانه من الصبح عندهم و اكيد الحين متعبهم ..
ام عبدالله : فديته .. والله اني متولهه عليه .. ندى المره الجايه جيبيه معاج ..من يومين ما شفته ..
ندى : انشاء الله خالتي ..يلا تامروني بشي ..؟؟
ام عمر : ما يامر عليج عدو .. خذي راحتج يا بنيتي ..
ندى وهي طالعه : مع السلامه ..
الكل : الله معج ..
طلعت ندى و هي تفكر بطارق اللي صارت تكلمه ع المسنجر .. مع انها ما كانت توافق تعطي ايميلها لشباب ..
وكانت كل اللي تكلمهم بالدردشه و بس .. بس هالمره طارق كان غير عن اللي كلمتهم قبل ..
جذبها بأسلوبه .. و كان لطيف كثير ... عطته ايميلها من بعد ما وعدها انهم يكونون اصدقاء و مثل الاخوان وبس ..
لان طارق خبرها انه محتاج يكلم شخص يفهمه .. و كانت ندى هالشخص ..


الساعه 10 بالليل .. كانو الكل رجعو بيوتهم ..
وكانت رغد تتصل ببنت عمتها مريم ..
رغد : اقولج تكلمو عنكم انتي و باسم و بتخطبون رسمي .. تقولين شنو يعني ..؟؟
مريم : زين شنو تبيني اقول ..؟
رغد : يـــــاربــــي .. ع الاقل افرحي شوي ..!!
مريم : وليــــش افرح ..؟؟ فيه وحده يقولون لها راح تتزوجين و تفرح ..؟؟
رغد : اذا لما تنخطبين و تتزوجين ما تفرحين .. متى بتفرحين ..؟؟
مريم : اقول .. ترا انا مو فاضيتلج .. و عندي امتحان مو مذاكرتله ..يلا باي ..
رغد : يالخبله الدراسه لاحقه عليها .. خلينا نسولف شوي ..
مريم : لا عمري باجر عندي امتحان .. و مو لاحقه عليه .. و شنو هالحنيه اللي نزلت عليج اليوم ..
رغد : مالت عليج .. والله الشرهه مو عليج .. الشرهه على اللي عاملتلج قيمه و متصله فيج ..
مريم : خلص مره ثانيه لا تعملين لي قيمه و لا تتصلين فيني .. باي
رغد : اقول يالدبه .. ليش ماجيتي اليوم لبيت عمي ابو عمر ..؟؟
مريم : دبه بعينج .. و كم مره لازم اقولج اني مشغوله بالدراسه ..!!
رغد : ماشاءالله عليج .. شاطره خخخخخخخ
مريم : تتطنزين حظرتج ..؟؟!!
رغد : لا عمري لا اتطنز ولا شي .. يلا خليج بدراستج .. باي
مريم : بـايـات ..

مريم و اريج و رغد يدرسون سنه اولى جامعه ..
و ترانيم و ريم و تغريد سنه ثانيه ..

عبير كانت واصله الثانويه .. و بعدها دخلت معهد تجاره واشتغلت ....و هي موظفه بسيطه .. رغم ان ابوها قال لها بترتاح عندهم بالشركه اكثر ..بس عبير سوت اللي براسها واشتغلت بالمكان اللي هي فضلته .. و اهلها ما عارضوها .. لانهم معودين اولادهم يختارون كل شي يخصهم وكل شي بحياتهم بنفسهم .......
مدير عبير يحبها.. وبيخطبها قريب .. رغم انه عارف انها ما بتوافق ..لانها اصلا مو معطيته وجه .. لكن نشوف بعدين شو راح يصير معاه ...



ع الارض ..

[mf$hm]

وين ردودكم

[دلوعة العالم]

مشكوووووووووووووووووورة على الموضوووووووووووووووع ومشكوووووووووووووووووووووووورة على الرواااااااااااااااااية الحلووووووووووووووووووووووووووووووووة وانا بانتظار التكملة بس لاتتطولي تحياتي

[mf$hm]

مشكوره يا دلوعة العالم على المرور
بكملها علشانك يا دلوعة العالم

........،،،، ثاني يوم الصبح ،،،،.........
ببيــت نــــاصر .. ابو عبدالله ..
تغريد : يمه انا رايحه .. تامريني بشي ..؟
ام عبدالله : سلامتج .. بس خلي بالج وانتي تسوقين ..
تغريد : انشاءالله .. يلا باي ..
ام عبدالله : في داعة الرحمن ..
طلعت تغريد وامها كانت تناظرها من الدريشه تبي تتطمن عليها لحتى وصلت السياره وطلعت فيها ..
بعدها صعدت ام عبدالله لغرفة ولدها باسم .. عشان تكلمه عن مريم ..
ام عبدالله : باسم ابيك بسالفه ..
باسم : أمري يمه ..
ام عبدالله : يمه من فتره واحنا متكلمين عنكم انت و بنت عمتك مريم ..
باسم وهو منزل راسه و ينافخ : اييييييي
ام عبدالله : و قريب بتبتدي العطله الصيفيه
باسم : بس انا ما عندي دراسه خخخخخخ
ام عبدالله : باسم لا تقعد تتطنز و تمزح .. هذا الموضوع هو اهم موضوع بحياتك ..
باسم : من قال لج ..؟؟ انا عندي مواضيع كثيره و مهمه بس انتي ما تدرين هاهاها
ام عبدالله : باسم خليك ولو مره جدي ..
باسم : وليش ما اكون جدتج هههههههه
ام عبدالله ابتدت تعصب على ابنها : بـــــاســـــم ..!!
باسم وهو كاتم الضحكه : خلص .. خلص .. كملي يا ست الكل ..
ام عبدالله : ولو انك مو وجه زواج .. بس شنو نسوي ..
باسم و هو فرحان : وانتي قلتيها .. مــووو وجــه زواااج !
ام عبدالله : باسم انطم وخليني اكمل ..
باسم : تفضلي ..
ام عبدالله : قلت لعمتك ام مريم تشوف لنا وقت نروح نخطب لك مريم فيه .. و بالعطله بتملجون .. والزواج بعدين نشوف متى نحدده ...شـــرايك ..؟؟
باسم : شنو رايي بعد .. انتي مخلصه كل شي ماشالله عليج .. يعني انا الحين حتى لو رفضت ما عاد ينفع ..
ام عبدالله و هي معصبه : بتضل طول عمرك خبل .. ولا عندك نييه تصير رجال ..؟؟!!
باسم : خلص لا تعصبين وهذا انا صرت رجال .. و اقولج اني موافق على كل شي تسوونه .... وهني قام باسم و هو يكمل : و يلا خليني اروح الشغل لان الوالد راح يعصب علي لو تأخرت ..
ام عبدالله : خليك دايما رجال .. مو شوي وتخترب .. و ابوك بعده ما راح الشغل .. انطره و روح معاه بعد شوي ..
باسم : اوكي ..
وطلعت ام عبدالله من عند باسم وهي تقول فخاطرها : الله يهديك يا باسم .. و يوفقك انت واخوانك ..


......،،،، الجامعه ،،،،.......
ريم : هلا والله بالغاليه ..
تغريد وهي جايه صوب البنات : وفيج اكثر..
ترانيم و هي تغمز : اي اكيــــد الغاليه .. دام اخوج يغليها لازم تغلينها معه ..
تغريد استحت من ريم .. مع انهم كانو ثلاثي ما يفترق .. و كانو قريبات من بعض وصريحات كثير مع بعضهن .. بس هالموضوع احرج تغريد ..لان عمر اخو ريم ..
ريم وهي ترد على ترانيم : اكيد غاليه .. بس انتي بعد غاليه لا تنسين انج بالمستقبل بتكونين زوجة اشرف ... ههههههه
ترانيم : ههههههههههههه فديته احلى زوج ..
تغريد : تصدقين ترانيم انكم مناسبين لبعض كثيــــر .. ملقوف و ملقوفه .. بتصيرون احلى ثنائي .. ههههههههه
ترانيم : خخخخخخخ اكيد بنصير احلى ثنائي .. و موتو قهر انتي و عمر ..
ترانيم كانت متعمده انها تحرج تغريد .. لانها عارفه انه تغريد خجوله كثير .. و كانت تحاول تخليها ما تخجل من ريم ع الاقل ..
ريم لاحظت خجل تغريد و ردت : اقول تغريد .. ترا انا نفسي صديقتج و بنت عمج .. و من يوم حنا صغار مع بعضنا .. تبين الحين تستحين مني ..؟؟
تغريد اللي استحت اكثر : لا ....( وهي تناظر ترانيم ) بس ترانيم صايره ماصخه كثير ..
ترانيم : بــل انا ماصخه ..؟؟
ويجون اريج ورغد و مريم... و يقعدون مع البنات ...
السلام عليكم ...
وعليكم السلام ....
رغد : انتو كله تقعدون بهالمكان ..! شرايكم نروح الجهه الثانيه .. والله انها احلى بكثير..
اريج : لا ما بنروح هناك.. فيه شباب كثير .. هنا بس بنات احسن ..
ترانيم : وهي رغد ليش تبي تروح هناك ..اكيد لنفس السبب اللي انتي رافضه تروحين عشانه ههههههههه
رغد : هي هي هييييي يا خفة دمج ... مالت عليكم .. اصلا بالجامعه وين ما رحنا بنلاقي شباب ..
ريم : اقول .. خلونا هنا احسن ..
اريج و هي تتنهد : شكله الامتحان ما مشى حاله .. كل اللي قريته نسيته يوم شفت ورقة الامتحان ..
ريم : كل هالدراسه اللي درستيها .. و تقولين ما مشى الحال ..؟؟
مريم : اريج ما ينخاف عليها .. اكيد بتكون ناجحه مثل عادتها ..
اريج : أأأميــــن ..
رغد : خلونا الحين من الدراسه والامتحانات اللي تلوع الجبد ..
تغريد : زين بشنو تبينه نسولف ..؟
رغد : عن خطوبة مريم مثلا ..
تغريد : انطمي يا بنت .. اسمها خطوبة بــــاسم ..
مريم : رغد ما عندج غير هالمواضيع ..
ريم : صحيح مريوم .. متى بيجونكم بيت عمي ناصر عشان يخطبونج ..؟؟
مريم : مدري .. بس يمكن بعد الامتحانات ..
تغريد : اي قالو انهم بيروحون يخطبونج بعد الامتحانات ..
ترانيم : و متى بتكون الملجه .. ترا انا اشتقت للحفلات ..
مريم : و بعد هذي ما ادري عنها .. اسألو تغريد ..
تغريد : بالعطله انشاءالله ..
اريج : زين متى الزوااااااااج ..؟؟
مريم : فاااال الله ولا فالج ..
تغريد وهي تمزح مع مريم : مريوووووووم انطمي ...!!! لا يكون ما تبين اخوي ..
مريم : انا ما قلت هالكلام ..
وتقاطعها رغد وتقول : ههههههههه خافت لا تهونون عنها و تزوجون باسم وحده ثانيه ..
وهني الكل ضحك و مريم محتشره ..
مريم : ترانيم سكتي اختج .. والا ابتلي فيها الحين ..
ترانيم : ههههههههه ما دخلني .. و تعملين خير لو خلصتينا منها خخخخخخ
ريم : لا جد متى بيكون الزواج ..؟؟
مريم : اكيد مو قبل ما اكمل دراستي ..
تغريد : و من قال ان اخوي بينطرج كل هالسنين خخخخخخ
اريج : صحيح مريم .. هالفتره طويله .. يمكن عمي ابو عبدالله هو واهله يبون العرس قريب ..؟
مريم : انا بقول لباسم انه لازم يكون زواجنا بعد ما اتخرج .. و هذا هو شرطي الوحيد ..
رغد و هي تغمز لمريم : قبل ما كنتي تسلمين عليه .. والحين بتسولفين معاه وتقولين له شروط بعد ..؟؟
استحت مريم وخاصه انه هالكلام كله قدام اخت باسم الي هي تغريد .. واللي كانت قاعده تضحك على مريم واللي كانت قبل شوي بنفس الموقف ... ردت مريم على رغد : اقصد اني بخلي امي تقول له ..
اريج وهي حابه تلعب على مريم : مريوم عمري عندي سؤال .. ممكن ..؟؟
مريم : تفضلي ..
اريج : بتجاوبيني بصراحه ..؟؟
مريم : انشاءالله ..
ابتسمت اريج ابتسامه خبيثه و هي تقول : مريوم .. انتي تحبين باسم ..؟؟
مريم : مالت عليج وعلى سؤالج ..
اريج : يؤ .. ليــش ..؟؟
تغريد : ههههههههه ليش ..؟؟ والله انه سؤالها حلو خخخخخ
مريم : سؤالها بايخ .. و تافه مثلها ..
اريج و هي تأشر على نفسها : انا تافهه و بايخه ..؟؟!! صراحه صدمتيني ..
ضحكت رغد و هي تقول لمريم :انا ما اشوف انه سؤال اريج تافه ..بالعكس حلو مثل ما قالت تغريد خخخخخ..
اريج : مريوم ..!! وعدتيني تجاوبيني بصراحه .. و للحين ما جاوبتي ..؟
مريم : ولو انكم تافهين .. بس بجاوبكم ..... مــا احبــه ..!!
تغريد وهي تشهق : مـــا تحبيـــن اخــــــووووي ..!!!
ترانيم : يؤ يعني تكرهينه ..؟؟!!
ريم : مريوووووم .. شو ما تحبينه ..
مريم : خبلات انتو .. باسم ابن خالي و بيكون زوجي .. شلون اكرهه ..
رغد : طيب شو معنا انج ما تحبينه ..
مريم : معناه انه مثله مثل باقي اولاد عمامي .. و قصدت اني ما احبه .. يعني ما اعشقه و احلم فيه خخخخخخ
اريج : لا الحمدلله ما طلعت تكرهه ..
رغد : مريوم مو تفشلينا و تقولين له انت عادي و مثل باقي اولاد عمي ..
اريج : نحمدالله لو قالت له هالكلام .. الخوف انها تقول له انت مثل اخوي هههههههه
ترانيم : تسويها مريوم ههههههههههههه
و تمو البنات يضحكون على مريم و هي معصبه ..


........،،،، الـشــركــــة ،،،،........
كان عمر رايح مكتب ابن عمه احمد ..
احمد : احمد يالغالي طلبتك ..
احمد : اففففففف شوف انا عارف طلبك و ما بقول لك عطيتك ..
عمر يترجى ابن عمه : تكفى يا ولد العم .. يمكن اليوم اقدر اشوفها ..
احمد : لا اليوم ولا غيره .. لعنبوه .. انت ما تستحي .. من يومين رحنا لهم و قعدنا متفشلين من عمي ابو عبدالله ..
عمر : انشالله يكونون الشباب موجودين اليوم .. و ما بنتفشل من عمي ..
احمد : حتى لو الشباب موجودين انت رايح تشوف تغريد .. الشباب شو دخلهم ..
عمر : بنقعد معاهم .. مو اولاد عمنا هم ..
احمد : اولاد عمي على عيني و راسي .. بس احنا كل يوم نشوف بعض .. و نتجمع دايما .. يعني مافي داعي لهالروحه ..
عمر : اقولك تكفىىىىىى ...
احمد : يالخبل متى قدرنا نشوفها من كل المرات اللي رحناهه لهم ..و بعدين هي بنت عمك ودايما عندكم او انتم عندهم و تقدر تشوفها ليش هالأحراج و تخلينا نروح لهم ...
عمر : انت تدري احنا ما نجتمع معاهم كثير .. اكثر الاحيان يكونو الرجال بمجلسهم والحريم بمجلسهم .. الا اذا كنا رايحين المزرعه نقدر نقعد مع بعض ..
احمد : احنا بعد الامتحانات بنروح المزرعه .. مو مطولين ..
عمر بعد ما تضايق من احمد : الله يلعني اذا طلبت منك شي مره ثانيه ... كل شي وله حل عندك ..؟؟!!
احمد : ههههههههههه ... لاتحسدني ماشالله علي .. بس لا تنسى و تطلب من جديد
عمر : يلا انطم ابي اكمل شغلي ..
و قام عمر عشان يروح مكتبه ..
احمد : ههههههه لا يكون زعلت خخخخخ
و راح عمر عنه و ما رد عليه ..


بهالوقت ببيت ابو مازن .. كانت ام مازن تصحي ابنها تركي ..
ام مازن : تركي قوم يلا تأخرت ..
تركي بعد ما صحى و كان نعسان كثير : يمه خليني نايم .. مابي اروح اليووم ..
ام مازن : ليــــش ..؟؟
تركي : مالي خلق اروح .. و بس ..
ام مازن : هالأيام ايام امتحانات .. واكيد عندك امتحان مو مذاكرله .. ولهالسبب مو راضي تروح ..
تركي و هو يشيل راسه بسرعه : شلون عرفتي ..؟؟!!
ام مازن : تركي لا تصير ماصخ .. و قوم يلا ..
تركي وهو يرجع راسه ع المخده : قلت لج مالي خلق ..
ام مازن : تــركـــــي ..!!!!!
تركي : يمـــــه ..!! ما عندي اليوم لا امتحانات و لا محاضرات مهمه ..
ام مازن : شلون مافي محاضرات مهمه .. كل المحاضرات مهمه ..
تركي : اوكي .. كل المحاضرات مهمه و عندي محاضرات مهمه .. بس ما ابي اروح ..
ام مازن : الحمدلله اني اقنعت ابوك ما يسفرك تردس بره .. انت هنا و مو قادرين لك .. مو تكون بره وبروحك ..
تركي وهو يمزح مع امه : ايييييي هذي ما بنساهه لج .. ما خليتيني اروح اتمتع بحياتي و شبابي ..
ام مازن : الحين مو هذا موضوعنا .. يلا ترا الساعه وصلت الـ11 ..
تركي : خلص تأخرت و ما اقدر اروح ..
ام مازن : شوف انت ما ينفع معك الطيب ..!!
تركي وهو يشهق بطريقه مضحكه : لا يكون تبين تضربيني ..؟
ام مازن : تركي انا مو فاضيه لك .. يلا قوم ..
تركي : اففففففففففف .. هذا انا قمت .. كبرتي السالفه ..و حتى النومه روحتيها . .
ام مازن : ومعصب بعد..؟!!! فوق ما متعبني ومخليني كل يوم اجي اصحيك مثل الاولاد الصغار .. لا وكل يوم والثاني تبي تغيب ..
تركي و هو قايم : خلاااااااااص .. هذا انا برووووح ..

تركي شاب وسيم ..و مغازلجي .. وكل البنات تتمنى انه يكلمها ..
وهو يدرس سنه ثالثه جامعه .. و مشكلته كرهه للدراسه .. ولهالسبب هو سنه ثالثه مو رابعه .. يعني فيه سنه رسب فيها ..ومحبوب كثير .. وصديق باسم وباسل و نفس نمرتهم ..


نرجع عند البنات بالجامعه .....
بعد ما صارت الساعه 1 خلصت كل محاضرات اريج و رغد و مريم ..
وطلعو كل وحده بسيارتها ..
اريج كانت بسيارتها و سرحانه .. كانت تفكر بالامتحانات اللي شاغلتها كثير ..وكانت خايفه لان الامتحان اليوم ما كان مثل ما كانت تبيه ..
وطول الطريق وهي مو منتبهه ..ولا مركزه عدل .. بعد ما انتبهت ما قدرت تصيطر على السياره .. و فجأه طلع بوجهها شاب ..وصدمتــه ..
بعد ما قدرت توقف السيــاره نزلــت بســرعـه وهي تصيـح ..شــافت الشــاب مرمــي ع الارض ..

[دلوعة العالم]

مشكووووووووووووورة ع الجزء بس ممكن لاتتطولي انا مرررررررررررررررررررررة متحمسة ههههههههه

[mf$hm]

مشكوره يا دلوعة العالم على متابعتك للرواية

وهذا الجزء علشانك