عرض كامل الموضوع : مـــــات قلـــبي <<روايــه جنان رومانسية
snow white
10-04-2006, 15:22
مات قلبي
هذي القصة أحداثها تدور في البحرين....:0013:
الشخصيات : بيت بو محمد :
أبو محمد رجال طيب وعلى نياته ... ولو إنه ساعات يصير عصبي لكنه بسرعة يرضى ويسامح ..عمره حلو في الأربعينات يعني للحين صغير.. عنده ولدين وبنت ..أكبرهم اسمه محمد وعمره تقريبا 19 سنة يدرس في الجامعة ثاني سنة محاسبة ..وبعده فاطمة وهي البنت الوحيدة بين ولدين وعمرها 16 سنة يعني أول ثنوي ..فاطمة بنت حبووبة طيبة وشاطرة ومتفوقة وعمرها ما شالت فقلبها على أحد ..قلبها مفتوح للكل ..ما تعرف شي اسمه قسوة أو كره ..تحب المنطق والعقل والرزانة ..لكن فوق كل هذا تحب تكون دلوعة بس مو بمياعة وهي رومانسية لأبعد الحدود وتحلم بالحب لكنها تخاف تجربه لأنه من اللي شافته يصير من حولها بدت تحس انه الحب ما عاد له وجود واختفى من قلوب الناس ...في الشكل فاطمة نسخة طبق الأصل لأمها ..لكنها أحلى منها وهزمتها في الجمال ..لأنها خذت شوي من ملامح أبوها..وأما وصف شكلها ..راح نعرفه من خلال القصة وأحداثها..
وآخر العنقود سلمان وعمره 12 سنة يعني بصف السادس الابتدائي ...وأما الأم فهي بعدها صغيرة وعمرها تقريبا 38 سنة وهي أكبر أخوانها وأحلى شي فيها حبها الكبير لأهلها وبيتها وبالأخص لعيالها عصبية بس قلبها أبيض .
بيت بو سعيد :
بو سعيد يصير زوج أخت بو محمد العودة وهي أخته الخليصة من أم وأبو واحد .عندهم بعد أخت خليصة ثانية وهي تصير بينهم ..وهي أم حمد لكن مابيكون لها الدور الكبير في القصة... عايلتهم كبيرة ومعروفة في أرجاء البحرين وهم بس تقريبا الاخوان والخوات عددهم 26 <<من ثلاث أمهات والعلاقة قوية بين افراد كل بيت وضعيفة بين بيت وبيت
أم سعيد وبو سعيد عندهم...سعيد وهو أكبر أخوانه عمره في الثلاثينات متزوج وعنده ولدين وبنت ..زوجته طيبة وحلوة ..وبعده لؤي ولد تقريبا منعزل على نفسه من أهله ما يحب يتخالط معاهم كثير ويحب يبقى بروحه معظم الوقت أو مع أصحابه.. بعدين تجي ليلى بنت حلوة وجميلة طيبة واللي فقلبها على لسانها ..تزوجت من سعودي اسمه سعود وهي عايشة معاه هناك.. كل أربعاء تجي بيت أبوها هي وزوجها والبيبي عبد الله ويرجعون الجمعة بيتهم ...بعدين تجي أبرار وهي تقريبا النسخة الثانية عن أختها في الشخصية والشكل لأن الفرق بينهم سنتين بس ..أبرار تزوجت قبل ليلى ..وعندها علي الله يخليه قمر العايلة..وبعدها يجي أحمد ولد حبوب وكوميدي ...يعشق الرومانسية وهو صديق محمد ..مشكلته إنه محد فاهمه في هالدنيا غير ثلاثة <<بتعرفونهم في أحداث القصة ...طيب ويحب الخير بس يوم يعصب لا أحد يقرب جنبه ..مجنون بطبعه يوم يحب يعشق بجنون ويوم يكره يحقد بجنون ..الكل يظن انه من النوع المستهزئ المتساهل في الحياة ما عدا القريبين منه ...عقبه تجي جواهر اللي تقريبا أكبر من سلمان بسنة وعمرها 13 سنة ..جواهر عيبها إنها ما تحب تتصرف تصرفات تناسب عمرها وهي تبي تبقى صغيره على طول وهذا اللي يخلي كثير ما يحبون النقاش معاها وآخر شي عندهم فاطمة وهي القمر اللي منور بيتهم عمرها 4 سنين تقريبا ..
أنا ذكرت هالعايلتين بس يمكن لانهم محور القصة ..لكن راح تظهر شخصيات أكثر وبتكون رئيسية ولها دور كبير وبنتعرف عليهم من خلال الأحداث اللي بتصير وبنعرف كل واحد ودوره وشخصيته ...
SAM ADAMZ
10-04-2006, 16:19
حلو واااااااااااااااااااااااااااااااايد حلو أنا أتطلع إلى المزيد.:04111: :010566:
snow white
10-04-2006, 16:24
الجزء الأول
الساعة 8 بالليل وعايلة بو محمد كلها متجمعة حولين الطاولة ..ومعاهم أهل أم محمد (أمها وأبوها وأخوانها الثلاثة) وفاطمة علاقتها قوية كثير معاهم وهي متعلقة فيهم أكثر من أي أحد..
فاطمة : النور وطفيته ممكن نبدأ الحفلة؟1 تراني والله ميتة جوع..
سلمان : اوووه وأنتي كله مستعجلة..أنتي أصلا متى ما متي من الجوع؟ يبة بنتك هذي تراني خايف عليها
بومحمد: ليش؟
سلمان : أنا خايف على مستقبلها من هالجوع اللي صايدنها تقول مجاعة أفريقيا..والله تنهب الأكل ..
هذي يوم بتكبر وتصير بطة منو بياخذها؟؟
فاطمة : هييه هييه انت انا اصير بطة؟!! ماتشووف روحك
سلمان : يمــة تراني من الحين اقولج هالبنت بتطيح في جبدج علة عليج انتي وابوي..اذا مو من الأكل من لسانها اللي ينقط عسل
الكل: ههههههههههههههههههههههههههه
فاطمة : ماعلييه ضحكوا ايه مستانسين مع حبيب القلب
سلمان : حــــرة احتري شبتسوين يعني؟ أنا أصلا أصدرت قرار
محمد وهو فاطس ضحك على أخوانه : سمعنا قرارك يا حضرة الوزير..
سلمان : وزير غصب عنك برضاك أو بدونه ...أنا يا أهل الخير قررت إنه نص الكيكة تصير لصاحب العيد ميلاد
(وهو يأشر على روحه )ألا وهو للبدر اللي واقف قدامكم الحين والنص الباقي تتقاسمونه كلكم ماعدا الآنسة بطة
الكل: هههههههههههههههههههههههههههههههههه
فاطمة : ماعليه لكن أنا اوريكم والله ما بسكت بتشوفوون
صالح (أبو أم محمد) : يا بنتي ما عليج منهم تعالي لي أنا حبيب قلبج
فطوم: منو قال انك حبيب قلبي؟؟ مابي ما يخصني أنت ضحكت علي ما بيك
بومحمد: أفاا بنتي زعلانة؟؟ الغالية فديتها زعلانة؟
أم محمد : أقول بو محمد عن التفرقة بس ..الحين صارت هي الغالية هاا؟
فطوم : ياربي شسوي فيها أنا هالحلوة اللي تغار؟ يمة تراني بنته مو وحدة من الشارع
محمد : أقول إنتي يا أم لسانيــن خلي الشياب يتناقشون مع بعض تراهم يمونون
أم محمد : حمووود منو الشياب؟؟ والله عاد اذا ابوك شايب انا بعدني حلوة وبعز شبابي
فطوم: أحلى يالشابة
سلمان::أقــول شنو رايكم نكنسل عيد ميلادي احسن وتقعدون تتناقشون منو الشاب ومنو الشايب؟
الكل: هههههههههههههه
مريم (أم أم محمد) : ياولدي ماعليك منهم تعال يالله نولع الشموع
سلمان : اوكي ماما يلا
فطوم : اشفيك انقلبت هندي مادري فلبيني
سلمان : انتي بس لو تكرميني بسكوتج والله هالحفلة بتعدي على خير
وتمت سوالفهم ونجرتهم اللي ماتخلص
فطوم لاحظت شي غريب يعني يمكن كانت متوقعة انه اثنين من خوالها الا هم هاشم ومحمود انهم ما يتكلمون كثير لوجود ابوها اهني وهم مو متعودين عليه
لكن واحد كانت شايلة هم سكوته ..وشكله أبد مو عاجبها..خالها حسن
حسن يمكن ما انذكرت شخصيته قبل... هو بطبعه ديموقراطي<<على قولته
طيب وقلبه كبيير وما تعود يزعل من أحد أبد ..لكن اذا زعل صعب أحد يقدر يراضيه...حسن متزوج وعمره 29سنة عنده بنت وحدة عمرها ثلاث سنين ..اسمها فطوم <<من حبه لبنت اخته سماها على اسمها
هو علاقته بفاطمة بنت اخته قوية مووت على الفارق اللي بينهم في السن الا انه مايحس فيه ابدا
يقول لها كل اسراره وهي نفس الشي ..يحب يسمع آراءها ومنطقها يعجبه ..ويميز فاطمة انه تفكيرها وشخصيتها اكبر من عمرها وهذا يمكن اللي يساعدها على انها تتماشى مع الكل...
نرجع لفاطمة ..اللي من البداية وهي خايفة على خالها..حاسة انه فيه شي وهي اكثر وحدة تعرفه وتفهمه
راحت له وبكل هدوء ..: خالي؟ شصاير؟ فديتك ليش متضايق وساكت؟
حسن : مافيني شي ..بعدين بكلمج على التلفون..شرايج؟
فطوم: مادري يعني انت متى بتمشي؟
حسن : اوووه فطيم لا تطولينها وهي قصيرة باجر بتصل فيج وبمر آخذج وبنطلع اوكي؟
فطوم : طيب اللي يريحك
مشت فطوم وهي مضايقة على حال خالها وصممت انها تعرف شفيه..بس طبعا هالوقت مو مناسب فبتنتظر هذا كل اللي تقدر تسويه...
snow white
10-04-2006, 16:59
على الساعة 10 تقريبا الحفلة خلصت والكل قاعد يسولف في صوب
فطوم قاعدة جنب حسن ومعاهم هاشم ومحمود ومحمد وكل م يرتفع صوتهم تسكتهم أم محمد وأبو محمد كان قاعد مع أبو حسن (صالح) ويتكلمون عن الأشغال وعن الحلال ..
وأما الحريم منار (أم محمد) ومريم (الجدة) قاعدين يتكلمون على العرس اللي راحوه مع بعض الاسبوع اللي طاف وكيف الناس قعدوا يمدحون في فاطمة وكيف انها تشبه أمها وايد ..
الوحيد اللي كان صاير بروحه هو سلمان..يلعب بالشوكة والصحن ..ويطالع هداياه ويفكر ويوم حس روحه طفش وزهق قال أنا ليش ما أسألهم وافك روحي من هالحيرة ..وفجأة
سلمان: يبــه ليش ما عزمنا أحد من صوبك؟؟؟
الكل سكت شوي وبعدها الأنظار توجهت لفاطمة.. لأنه الحفلة كانت مسؤوليتها وهي اللي منظمتها وحتى الأكل هي شاركت في طبخه ..والهدايا كتبت قائمة بالأشياء اللي اخوها يحبها ووزعتها على الأهل عشان كل واحد يعرف شنو ياخذ وما يحتار ...يعني كانت الحفلة كاملة والكامل الله...
فطوم هنا ارتبكت وحست انهم ينتظرون منها اجابة وهي مو عارفة شتقول: اممم يعني اهو السبب انه ..يعني مثل ماتدرون ماشاء الله عمومي وعماتي ماينعدون على الأصابع أبد..ولو بتحطون معاهم عيالهم وأزواجهم ولا جيش عنتر !!
حست بسخافة تعليقها ..بس كملت : أنا إن عزمت مابقدر أعزمهم كلهم وأنظم الحفلة لهم!! وبعدين هم نادرا مايذكرون يعزموننا ...هالمرة حست بإنه كلامها غلط وكملت وكأنا مرتكبة جريمة..
: أنا ما أبي أفرق بينهم.. يعني أعزم ناس وأخلي ناس!!
بو محمد وهو قايم..: أختك جاوبتك يا سلمان ..يلا عن اذنكم
أبو حسن: على وين يا ولدي تو الناس؟!
بو محمد: يا عمي وراي قعدة من الصبح والشغل واصل حده ..تدري بعد اذا ماجابلت الحلال ..منو بيجابله؟؟
أم محمد : عساك ع القوة يا بومحمد
محمد: قواك الله يايبة وعسانا ما ننحرم منك
بو محمد : الله يقويكم ..يالله يا جماعة الخير تصبحون على خير
الكل : وأنت من أهله
وبعد ما قام بومحمد ظلوا يسولفون ويضحكون ...على الساعة 12 بالليل فطوم كانت على سريرها ..والأفكار تودي فيها وتجيب
كانت تقول في نفسها ..:ياربي .. مادري اللي سويته صح ولا لا؟ بس فعلا يعني لو رحت وعزمتهم كلهم كان..اوووفف أنا مابي أفكر في هالموضوع لأني ما غلطت وفجأة ..طرا شي في بالها..وهي تقول لروحها
من زمان وانا مبتعدة عنهم ..ولا كأنهم أهلي ..كل هذا بسبب الموقف اللي صار!! ما أعرفهم إلا أوقات المناسبات!! يعني معقولة!! يكون السبب اللي مانعني عنهم هو نفس الموقف..اي ليش لا من يومها وانا زياراتي قلت لهم ..يعني أحمد هو السبب!! أنا اتجنبهم كلهم عشان أتجنبه هو؟!!
لا لا لا لا مستحيل مو أحمد ..نو وي أصلا شنو اللي دخله في السالفة الحين..
بس والله كانت اشكالنا بتموت من الضحك لو إنه عزمتهم كلهم.. جان الحين انا وامي والخدامة كلنا نعاني من التنظيف...خخخخخخخخ أنا أحسن لي أنام وباجر يصير خير..
حاولت ..لكن أبد النوم كان مجافي عينها..تحس نفسها تذكرت موقف كانت تبيها من الله إنها تنساه..
وأول ما غمضت عينها تذكرت كل شي.. وكأنها تشوف كل شي قدام عينها قاعد يصير...
فطوم : احمدووووو ترا بذبحك لو عدتها هالحركة فاهم
احمد : وان شاء الله انا شسويت؟؟ ماسويت شي
فطوم: عيب عليك تلصق في البنات روح تباعد عني أنا وبنت عمتي مع بعض تجي تحشر نفسك بيننا ليش؟
أحمد : زين وأنا أقعد مع منو؟ أغربل منو وأطفش منو؟ وبعدين انا خبري فيج انج ماتشتهين هالعصاية اللي صوبج
ايمان : هييه انت منو العصاية؟
فطوم : احمد عيب تقول لها جذي
احمد : زين بس عشان خاطرج خلاص ولو اني ما اشتهيها خير شر
ايمان : ما شاء الله يعني انا اللي اشتهيك اصلا انا ما اطيقك وتلوع جبدي من اشوفك
احمد : فطيم لو ما سكتيها الحين بكفخها وبخليها تموت من الصياح
فطوم : مايخصني سوو اللي تبونه انا واقفة اهني وسطكم وانتو ابد مو مسوين لي حساب بالطقاق
سوو اللي تبونه
وراحت تركض ودخلت وهي حاملة صورتها اللي عطتها اياها عمتها كانت جايبته لها هدية واحمد كان يبي يغربلها فياخذ الصورة ويركض ويخليها تصيح لين ما يحن قلبه ويرجعها
snow white
10-04-2006, 17:40
فاطمة أول ما دخلت شافت الكل قاعد ..على طول راحت وحضنت امها وقعدت عندها ..في ذاك الوقت تقريبا كان عمرها مابين 9 و 10 سنين.. أمها حست انها زعلانة لكن سكتت لأنها عارفة انه بنتها ماتخبي عنها شي وبتقول بنفسها.. وتوها فاطمة بتتكلم الا الأخ أحمد جاي يوقف جنبها وهو يطالعها كانه يعتذر.. لكن هي ماعبرت وبعده جت ايمان وقعدت جنب فاطمة لكنها كانت زعلانة منها هي بعد فما كانت تكلمها ...حستهم سخيفين في هواشهم ومضاربهم ..
أحمد : خالة ..انا بروح البرادة (البقالة) تبين اشتري لج شي؟
أم محمد : فديتك يا ولدي .. لا مابي الا سلامتك ..
أحمد : متأكدة خالة؟ تراني مابروح بعدين
أم محمد : ههههه أي متأكدة
أم محمد : انت وين حمود ولدي عنك ... ماشوفه يلعب معاك
أحمد : ايه خالتي ولدج هذا خاين مادري وين راح هرب بروحه وخلاني مع أم الليف ايمانو
أم محمد : هههههههههههههههه أحمد طالع لك لسان اشوف شنو هذا بعد أم الليف؟!!
فطوم كانت تسمع كل شي يصير لكنها ولا التفتت أبد
أحمد : آسف خالتي بس تراها تستاهل ..المهم خالة يصير فطوم تجي معاي؟
فطوم : هيه هيييه انت لو أنا أبي أروح ولا ما بي أروح أنا أقرر مو تسأل أمي
تراها لو وافقت وانا ماوافقت محد يقدر يغصبني فااهم
الكل انصدم حتى عماتها وعمومها سكتوا وهم يسمعونها وبعد دقيقة
الكل: ههههههههههههههه ههههههههه
عم فطوم : طمطوطة اشوف لسانج اطول منج ..وهو يطالع امها : هذي ترا لين كبرت اتحدى احد يجبرها تاخذ واحد غصب عنها ...
الكل : هههههههههههه
أم أحمد (أم سعيد) : فديتها مستحيل أحد يغصبها على أحد
فطوم : أي صح كلام عموتي
أحمد : انتي استحي على ويهج شوي ..خبري البنت يوم يقولون هالكلام لها تستحي مو تقول بعيون قوية أي صح
فطوم : أنت ما يخصك
وقامت تمشي وتوها بتطلع إلا أمها تناديها وتسألها وين بتروح
فطوم : ماما بروح اشتري لي اسكريم خاطري فيه
أحمد : لحظة هيه تعالي بروح معاج .. هناك شارع وسيارات
فاطمة ما اعترضت لأنها فعلا تخاف تطلع بروحها ..وراحت معاه
ويوم خلصت واشترت رجعت وطول الطريق وهي ساكتة وما تكلمه ..أحمد ندم على اللي سواه خاصة انه يعرف انه فاطمة ما تحب الهواش ...
أحمد : اللاي حلو اسكريمج تبادليني؟
فطوم : لا مابي أنا بعد أحبه وما أحب اللي أنت ماخذه
أحمد : طيب على راحتج ..فطوم أنا آسف بس مابتهاوش معاها مرة ثانية
فطوم وهي مبتسمة :أول مرة اسمع منك كلمة آسف
أحمد : هههههههه يمكن لانه أول مرة أحس بإني غلطان
فطوم : ههههه زين
وكانوا متراضين وسمن على عسل
وأول ما فتحوا الباب الخارجي طاحت فلوس فطوم وراح احمد يشيلهم معاها
والباب الداخلي كان مفتوح ..يعني السوالف كلها تنسمع
أم سعيد : والله فديتهم شفتيهم ما أحلاهم؟
أم أيمن (وحدة من عمات فاطمة) : أيه والله لايقين على بعض
أم محمد : بعدهم صغار على هالكلام ..
أم سعيد : والله مافيها شي ..أنا ما أتمنى لولدي إلا وحدة من أصل وفصل ووين نلاقي أحسن منها؟
فطوم وهي تساسر أحمد : اسمع الظاهر بيخطبون لأخوك
أحمد : ههههه والله الحريم ما يجتمعون إلا ولازم يخطبون وحدة لواحد
فطوم: ههههههههه في هذي صدقت والله يوم اكبر مابي أصير مثلهم
أحمد: لا ما أتوقع بتصيري مثلهم
فطوم : ههههه بنشوف
ومسكينة توها بتتكلم الا وتسمع أم سعيد تقول : تدرين يا أم محمد اتوقع بنتج يوم تكبر
بتطلع قمر وتجنن واعتقد العرسان من أول ما يصير عمرها 16 بيدقون بابكم
فاطمة من سمعت هالكلام ..قفطت من الفشيلة والاحراج مع انها صغيرة بس بعد انحرجت
أحمد :ههههههههه طالعي ويهج شصار فيه ماتسوى على امي قالت هالكلمة
فطوم : اسكت بس اسكت أحسن
أم محمد : والله يالغالية ما أظن بنلاقي لبنتنا أحسن من ولدكم بس تو الناس على هالسالفة خليهم يكبرون ويصير خير
فاطمة وأحمد في موقف لا يحسدون عليه ..الاثنين التفتوا لبعض وطالعوا بعض بنظرة غريبة كل ما فكرت فيها فاطمة ماتقدر تفسرها ..
فاطمة على طول فتحت الباب وراحت تركض ماتدري لوين بس تبي تركض
أحمد انحرج بقوة : ياربي الحين باللي قالوه مستحيل فطوم تكلمني عقب اليوم
تعمد أحمد انه يصك الباب بقوة علشان يبين انه دخل ويسكتون عن الموضوع
ودخل وهو طول الوقت يفكر في اللي سمعاه وأمه كانت تناديه وهو أبد ولا على باله ..
أم سعيد : أحمدوو وصمخ وينها فطيم؟
أحمد : هاااه اه اه فطوم أي صح شافت وحدة من ربعها وقاعدة تلعب معاها برا
وعدا اليوم على خير ..رجعت فاطمة من عقب ربع ساعة تقريبا وظلت ساكتة لين مارجعت البيت ورفضت انها تروح هناك مرة ثانية.. ومع الأيام والسنين هالسالفة نستها وماتدري ليش رجعت في بالها الحين ...
ظلت تفكر الين ماتعبت ونامت على هالذكرى اللي بالنسبة لها محرجة وغريبة
_____________________________________________
خلص الجزء الأول وان شاء الله عجبكم
وانتظروا معاي عشان نعرف ...ياترى هل بيصير تطور مع فاطمة ومع هالذكرى؟؟ ولا بتنساها مثل مانستها قبل؟
وحسن ؟؟ شنو اللي مضايقة ومزعجه؟ وشنو بيقول لفاطمة لما يشوفها؟ ابو محمد ..ليش تضايق فجأة من بعد كلام بنته وترك الكل وقام؟
كل هذا راح نعرفه في الجزء الياي ان شاء الله
ad494nan
10-04-2006, 17:50
القصه مرررررررررررررررررررررررررررررررررررررررررره حلوووووووووووووووووووووووووووووه
مشكوررررررررررررررررررررررررررررررررررررره على التعب
snow white
10-04-2006, 18:00
شكرا اخوي ...واتمنى لو الاقي اقبال عليها
هذي اول مرة اكتب فيها قصة طويلة ..واتمنى تعجبكم ...ترا انا للحين ماكتبت الجزء الثاني وابتديت انزلها لكم وهالمنتدى الوحيد اللي نازلة فيه القصة
ad494nan
10-04-2006, 18:40
الله يوفقك وتنزلي الجزء العاشر ياسنووايت
ياااااااااااعلي يااااااااااااااااعلي
هاي بعد اول قصة اليش عجل اشلون في الا ياي
المهم رووووووووووووووووووووووووووووووووووعه ماشاء الله عليش ابداااااااااااااااااع ليس له حدوود
بنت العز
11-04-2006, 12:57
يعطيك العافيه حبيبتي
من اسمها شكلها روعه
برجع اقراها
مشكوره يا قلبي
وان شاء الله اقرها اليوم
مو بس من اسمها حتى الحركاتها روعه
ماشاء الله
نمطها للكلام بعد فَلَه >> يعني روعه
انثہٌى نرجسيہٌ
12-04-2006, 11:12
تسلمين
يا قلبي على الجزء الحلوو
ولا تحرمينا من الباقي
ما خلتيني ادرس ( وجه زعلان )
بس مرررة خطيرررة
snow white
12-04-2006, 16:37
السلااام
السموحة على التقصير <<<ادري انو طولت على مارديت
مشكوورين كلكم على المرور
....أنا الحين ما أقدر أطول ...اسمحولي يمكن لو بنزل الجزء الياي بيكون في الليل ..
عندي ظرف طارئ وأنا دخلت بس عشان اعتذر لكم لو اني طولت ...جدتي في المستشفى ..صابتها جلطة ..ادعووولها والله اني ميتة خوف عشانها ..محتاجة لدعواتكم ....
بس حبيت اقول للدوووبة سوير <<اقهرك
موو ذنبي اذا ماتبين تذاكرين <<<تبي تطلع براءة
هههههههه لا والله سوير المذاكرة اهم وقلتلك اقريها من بعد ماتخلصي
snow white
12-04-2006, 20:11
الجزء الثاني
أم سعيد : يللا يا ولدي ..قوووم
أحمد : ....
أم سعيد : يلا يا ولدي ..لاتفوتك صلاة الفجر
أحمد : هممممممم...
أم سعيد : يعني أنا أبي أعرف هالولد على منو طالع !! أخوانك كلهم قعدوا ..وحتى لو إنهم ما قعدوا كفاية أناديهم مرة وحدة بس وألاقيهم واقفين قدامي ..
أحمد : يمــه ..دقيقة ....والله بس دقيقة خليني أنام
أم سعيد : يعني هالدقيقة شبتسوي؟؟ يلا قدامي تراك رجال وحركات الدلاعة ماتليق عليك ..يلاااا
أحمد : حرام عليج يمة ..أبي أنام ..نايم متأخر أمس
أم سعيد : شنو حادك على السهر؟؟ بس تدري ماهو ذنبك ولا منك .. هذا من هالكمبيوتر هالسوسة .. والله يا حمود تراني ناوية عليــه...
كانت تقولها وهي تهدد وتتوعد وأحمد من سمع هالكلام نقز من مكانه ..
أحمد : هااا!! لا لا خلاص قمت يمه قمت ..
أم سعيد : ودي أعرف بس وش اللي تحبه في هالشي ..مافيه الا تضييع وقت ويجيب عمى للعيون ..وش الحلو فيه؟؟
أحمد من بعد كلمة وش اللي تحبه سرح وصار يقول في خاطره ..آآآه يا يمة أشياء وايد ...آآآه يا يمة من اللي أحبه
وأمه قاعدة تكلمه وهو أبد مو معاها على الخط..
أم سعيد : وصمخ ياخذك وياخذ بليسك ..هالولد بيجنني وين رحت!! ساعة وأنا أكلمك ..
أحمد : هاا ..تقصديني أنا؟؟
وأم سعيد دارت بطريقة إنها تستهبل وتطالع الطوفة ...وبعدين تأشر عليها بصبعها وهي متخصرة بيدها الثانية
أم سعيد : لا أبد ..أكلم الطوفة اللي وراك ..هذي بس مادري شفيها يا ولدي شكلها زعلانة ما ترد علي
أحمد : هههههههههههههه يا حليلج يا يمة ...سوري بس سرحت شوي ..اوووووووه تراني نسيت
أم سعيد وهي مستغربة : شنووو؟
وراح لها وحبها على جبينها أحمد : فديت اقمر اللي قدامي اللي من شفته نساني حتى الكلام وماصبحت عليه
أم سعيد: ههههههههه آآه منك أنت وين الواحد يقدر عليك بهاللسان ..فديتك صباح النور والخير والمسرات
وعلى الكلمة الأخيرة الا جواهر تتحلطم وتكلم أمها
جواهر : يمـــــــــــــــــة شنو هالخيانة !! ما هقيتها منج !!! لا لا ومع منو؟؟ مع هذا بو وجهين؟!! أفاا
أم سعيد : بسم الله وش صاير شعندج انتي يا أم لسانين؟
جواهر : يمة مو أبوي أعلن لج بتصريح وقدام الجميع ...يمنع منعا باتا تتفدين أحد غيره؟؟
ومن عقب ما نطقت جواهر ظلوا دقيقة كاملة هم الاثنين مو مستوعبين الموقف ..ومن طافت هالدقيقة ضحكوا كلهم
الكل : هههههههههههههههههههههههههه
أم سعيد : آآآآه منج الله يهداج طيحتي قلبي ..بغيت اموت وانا منصدمة وأقول اشفيها بنتي استخفت
أحمد : والله يمه مو شي جديد على بنتج ...أساسا هي من يومها وهي مستخفة
جواهر : هييه أنت محد طلب رايك ...وبعدين تراني بعلم عليك لو ما سكت فاااااهم!
أحمد : لا لا لا لا بس فديتها أختي أغلى وأحن وأحلى أخت في الدنيا
أم سعيد : شنو اللي بتعلميني عليه؟؟؟ شفيه أخوج؟؟؟
أحمد وهو يبي يغطي على السالفة ...أحمد : لا يمة ..بس بصراحة ...أنا ....
أم سعيد :: قوول انطق اشفيك شصاير؟؟
جواهر وهي متلومة على روحها على اللي قالته ..وندمانة على الموقف اللي حطت أخوها فيه ...
جواهر : لا يمة السالفة ومافيها إنه الأخ الكريم ....أمس كان
وتوها بتتكلم إلا أحمد يصرخ : لاااااااااااااااااااااااا .. وبسرعة حط يده على فمها اشان ما تتكلم
جواهر وبدون أي ردة فعل للي سواه أخوها باعدت يده وكملت بسرعة : الأخ أمس عازم جم واحد من ربعه ويبي يجيبهم البيت ...بس ما راح يجيبهم عشان مايتعبج ويخليج تسوين لهم أي شي أو تطبخين وتتعبين عمرج ...وقرر إنه يعزمهم على مطعم ويخلص كل مصروفه !!
أحمد وهو للحين مو مصدق اللي قالته أخته ...أم سعيد : صدق الكلام هذا يا أحمد؟؟؟
أحمد :هاا ...إإ ...ههه ايه تخيلي!!
أم سعيد : مالك حق يا الغالي ...أنت يوم اللي بتجيبهم قولي وأنا أسوي كل شي ولا تناقشني في أي شي ويلا بسرعة خلصوا أنا أنطركم تحت ...
نزلت أم سعيد وهي مقتنعة تماما باللي قالوه فوق ...
جواهر غمزت لأخوها وقالت له ...: لا تتفاجأ ..وعدتك ما بقول لأحد .. وبالأخص لأنه ما كان لي حق أسمع الكلام اللي كان بينك وبين ليلى ..أدري إنك ما تخبي عنها شي لا هي ولا أبرار ..ما راح أعلم أحد ...
وطلعت وتركت أخوها في حيرة ودهشة في نفس الوقت ...
أحمد كانت أفكار وايد تدور في باله ..معقولة هذي هي جواهر!! جواهر اللي كان دوم يقول إنها مثل اللي يمشي بطريق ..وبنص الدرب يلاقي مكان يعجبه ..ويبني حوله سور وما يقرر يطلع منه أبد ..!! هذي هي اختي معقولة!! الظاهر إنها بدت تتغير ومحد حاس فيها ...ايييه انا خذتني الأفكار خلني أجهز أحسن لي..
----------------------------------------------------------------------------------------------------
في نفس الوقت ..وفي أرض البحرين كان فيه بيت ثاني ..اللي يشوفه يقول أهله داخلين حرب !!
غفران : بدووووور .....بــــــــــدووووور
عمار : وصمخ ...اشفيج تصارخين من صباح الله خير؟؟
غفران : اووه .. حرام عليك ..على طول طلعتني أنا الغلطانة ...شوف أختك شمسوية!؟
عمار : ليش شسوت؟
ورفعت غفران بحثها اللي كان على مكتبتها ..وعطته اخوها .. وهو من شافه ماعرف شنو اهو ..
عمار: شنو هذا اللي ماعطتني إياه ؟
غفران : بالضبط !! شفت شلون !! ولا عرفته
عمار: شقصدج مافهمت
غفران : هذا بحثي اللي المفروض أسلمه اليوم ..وأمس سهرانة عليه للساعة وحدة ..وأختك الخبلة رمت قلمها الخراب عليه ..ونزل الحبر اللي فيه على بحثي كلــه!
عمار : أفـــااا زين شبتسوين الحين؟؟
غفران والدمعة في عينها ...: مادري مادري ..مو هذا اللي مضايقني !! عمار مابيدي شي وبعدين اليوم آخر موعد للتسليم..
عمار : أنا أوريج فيــها ...بـــــدووور بدورووو وريح ياخذج قولي آمين
بدور داخلة وهي مادة البوز شبرين وهي يازعم معصبة وتقول ::اووووووووف خير شتبون أنتو ؟؟ لوعتو جبدي
من شوي غفور كسرت البيت من صراخها ..والحين حضرة المحترم الأخ القدير عمار ...أنتو شعندكم اليوم؟؟
عمار عصب عليها هالمرة من قلب ...يعني غلطانة وبعد جاية وترفع صوتها ..ولا والقهر إنها طول الوقت كانت تسمعهم وما ترد !!
راح عمار جنبها وطالعها بنظرة قوية وحارقة وبعدها مسكها من شعرها وشد عليه بقوة ..وعورها وألمها بشكل فظيع وصارت تصارخ وتترجى فيه
بدور : يالدفش خل شعري حرام عليك ... توني مسشورته ..
عمار : أنتي ماتفهميني متى بتعقلين؟؟ هاللسان اللي طوله يتعدى العشرة أ/تار متى بتقصرينه؟؟ متى تخلين هالتصرفات البايخة مثل ويهج ..تصرفات بنات قليلات أدب مو متربيين ...بنات مايعات ...وأنا ما أشتهيهم أبد فاهمة ؟ ومرة ثانية يوم أحد يناديج تعالي وردي على طول وبأدب ...
بدور خلاص حست إنه نهايتها قربت لو ردت بكلمة غير ..
بدور : إن شاء الله ..فهمت
وكلها ثواني إلا وأم عمار داخلة عليهم الغرفة ..
أم عمار : خير؟ شصاير شسالفة؟ صوتكم لآخر الشارع ..
غفران : يمــــه ..وراحت على طول وحضنت أمها .. والدمعة اللي كانت بعينها نزلت ..
أم عمار : بسم الله عليج ..اشفيج؟
عمار : هذي الدعلة بنتج بدور ..شوفي إهمالها ودلعكم وين بيوصلها ....وطلع من الغرفة بكل عصبية ..
أم عمار : أنتو شسالفتكم يا الله صباح خير ..
غفران : أي خير ؟ أي خير؟؟ أنا اليوم شسوي مع المعلمة .. هالأستاذة ما عندها غير أسلوب التهزيء والتجريح
وبعدها غفران قالت السالفة كلها لأمها ...
واهني بدور حست بذنب وكسرت خاطرها أختها ...
بدور : حبيبتي غفورة ..زعفرانة تراني آسفة .. ما كنت أقصد ..والله مادريت إنهم أوراقج ..أو للصراحة ما هقيتهم بحثج ..ظنيتهم أوراق عادية ...
غفران بطبعها طيبة وقلبها يسامح على طول .. يمكن تشيل فخاطرها وتزعل وما تنسى ..وحتى لو حست إنها غلطانة واعترفت بهالشي تظل تلوم غيرها على أخطاءهم وتذكرهم فيها ..
لكنها رغم هذا ماتحب تترك أثر في قلب غيرها وتقولهم إنها مسامحة مهما كانت الغلطة
snow white
12-04-2006, 20:55
غفران : لا ياقلبي خلاص أنا بتصرف اليوم .. بس المشكلة إنه هالبحث مجهود شخصي.. يعني كل واحد يجمع له معلومات عن شيء محدد ..من كل شي سواء النت أو كتب أو غيره ..وبعدها يكتب تقرير بأسلوبه عن كل اللي اكتشفاه وعرفه ...وأنا للأسف لا حفظته في فلوبي ولا في الكمبيوتر ..يعني مافي أمل أسترجعه ..
أم عمار ... أنتي يابدور قومي الحين ونزلي لأبوج .. وأنتي ياغفران توكلي على الله ويالله بسرعة خلصي وتعالي
البنات : إن شاء الله ..
أول ما طلعوا ظت غفران تطالع نفسها في المنظرة وتفكر .. ياترى شبتسوي ؟؟؟ وشلون تقدر تحل هالورطة؟
وعلى هالفكرة ..رن تلفونها على نغمة ...يابويا
وغفران بفرحة وركييض راحت للتلفون وردت وهي تغني مع الأغنية ...
غفران : ألــــــــــــــــو....
---------------------------------------------------------------------------------------------------------------------------------------
نرجع لأحمد ..اللي خلاص ..جهز وصار من أحلى ما يكون ..قبل لايطلع ..ألقى على روحه في المنظرة النظرة الأخيرة ..عدل ياقة قميصه ورتب شعره شوي..مسح عليه بيده على ورا ..وقرر يستخدم العطر الجديد اللي اشتراه أمس .. رجع العطر مكانه وقال في خاطره ..آآه يا محلاني .. ضحك على روحه وحمل مفاتيحه (أغراض الجامعة في السيارة ) صك باب حجرته ..وأول ما دخل الصالة .. ابتسم في وجه أبوه ..
أحمد : صبحكم الله بالخير ..
أبو سعيد : صبحك الله بالخير والسعادة ياولدي
جواهر وهي حاملة فاطمة :الله الله شهالزين .. وصفرت وقامت تصفق وبعدها كملت كلامها .. شعنده أخوي كاشخ اليوم؟
وكان فعلا أحمد في ذاك اليوم كاشخ ..أحمد طويل.. وجسمه متناسق والواحد يحس فيه قوة...كتفه عريض ..ووجهه ...ما شاء الله عليه بالمعنى الحرفي يجسد ملامح الجمال ..عيونه واسعة وبنية ..وحجاته عريضة شوي ..بس صايرة على طول عينه ومبينتها وموضحتها بشكل رهيب.. أنفه متناسق مع وجهه ...طويل شوي وحاد نوعا ما ..وشعره ناعم وبني... ومع لمعة الشمس يطلع تقريبا بلمعة ..يعني يحطم معنى الجمال ..أحمد أبيض وبياضه صافي ..مافيه أي شموخ أو آثار جروح <<على عكس أخته جواهر تماما ...وفي ذاك اليوم كان لابس جينز أسود فيه مسحة من اللون الأزرق ومعاه شيرت أزرق بنفس لون المسحة بس الكم والياقة كان لونهم أبيض
أحمد : أشكر شعورج ..إحم إحم مايحتاج تقولين لي إني أجنن ..أدري من زمان ..
أم سعيد وجواهر ضحكوا .. أبو سعيد اكتفى بالابتسام لولده ..وفاطمة شافت الكل فرحان قامت هي بعد تضحك..
الكل ضحك من كلام أحمد ... ماعدا ..لؤي ..طالعه بنظرة وبعدها وقف وراح حب راس أمه وبعدها أبوه ..
لؤي : أنا أستأذن ..وراي شغل
بو سعيد : خلك يا ولدي شوي معانا .. تو الناس على شغلك ...
لؤي : لا يبة خلني أروح أحسن
أم سعيد : خلك يا ولدي .. القعدة ما تحلى من دونك ..
لؤي : مع السلامة ..وأول ما مشى لؤي تكلم أحمد
أحمد : انا مادري هالإنسان شلون متحمل نفسه
بو سعيد : عيب عليك هذا أخوك العود
أحمد : ولو .. هذا مو سبب يخليني أحترم إنسان ما يحترمني ..
أم سعيد : خلاص .. بس خلاص .. انسى .. انسوا ... اللي فات مات
أحمد : عمري ما بنسى ..عمري ما بنسى
ووقف من مكانه ...
أبو سعيد : حرام عليكم ... تعبتوا قلب أمكم ..حرام عليكم يا عيال أمكم شذنبها ... أنا شذنبي
خلاص انتو كبرتوا وفهمتوا وعقلتوا ..انسوا اللي صار بينكم .. انتو اخوان ... ومالكم الا بعض ...
وأم سعيد وكأنها تكمل على كلام بو عيالها : من بعد عيننا .. مالكم إلا بعض ... صدقني هالدنيا ما عاد فيها خير وما عاد الواحد يستأمن حتى الكلمة عند الغريب...
أحمد : ما عندي كلام غير اللي قلته .. هالإنسان محيته من حياتي وما عاد له وجود فيها .. أصلا ما أعترف فيه
وأم سعيد قلبها كان يتقطع وهي تسمع كلام ولدها .. كلماته كانت مثل الخناجر تطعن فقلبها ..معقولة ..هذولا الاثنين من دم ولحم واحد !! الدم اللي بعروقهم نفس الدم!! أنا اللي سقيتهم هم الاثنين من نفس الحليب !! لهم نفس الأم ونفس الأبو !! ليش يا الدنيا .. ليش الواحد الفرحة بقلبه ما تكمل
أم سعيد ابتدت دموعها تعلن انكسارها ...وبجت ..بجت دم .. بجت حسرة وألم ...على عيالها ..اللي صاروا أغراب !! آآآه منج يا الدنيا ..دومج ظالمة ...(هذا الكلام كان يدور ببال بو سعيد )
أحمد : لا يايمة دموعج هذي لا تنزل ..احنا الاثنين على خلافنا ما اتفقنا الا في شي واحد ...
بو سعيد : ما اتفقتوا الا على دماركم يا ولدي .. ما اتفقتوا الا على انكم تنسون الدم اللي جمعكم
أحمد خلاص ما فيه يتحمل أكثر .. هالمشهد ما يقدر يواصله .. هالكلام ينقال كل يوم ..كل يوم وكل لحظة وهو يسمعه ..مايقدر يقعد أكثر ...نطقها وودعهم
أحمد : مع السلامة ..اليوم بتأخر ...
وطلع من المكان وترك البيت وهو مضايق
أول ما ركب سيارته شغلها ومشى على طول ...مايبي يبقى اهني اكثر ...رفع سماعة التلفون واتصل ...
أحمد : ساعة على ما تشيله !!
محمد : وعليكم السلام والرحمة ..الحمد الله بخير اسأل عن احوالك..
أحمد وهو منحرج : سوري السلام ..
محمد : خخخخخخخ لا عادي لا تنحرج ..وعليكم السلام
أحمد : وينك فيه الحين؟
محمد : اممممممممم أنا بعدي في البيت ..للحين أخواني ما جهزوا
وعلى كلمة أخواني تذكر أحمد فاطمة ..وظهرت في باله ذيك البنت الصغيرة اللي تزعل وترضى في نفس الوقت ..تذكر آخر مرة شافها فيها ..وكيف إنها كبرت .. ابتسم على هالذكرى .. تذكر احراجها يوم كانوا صغار.. وتذكر ثاني مرة شافها منحرجة ..بس آخر مرة كانت غيــــــــــــــــــر ..كانت بصراحة لا تنوصف .. فاطمة كانت محطمة على الكل ... بشكلها وأناقتها وفستانها الراائع ...اي الفستان .. لأنه وبدون قصد ..دخل فجأة وهو ما يدري بإنه في أحد داخل لازم يتغطى منه .. وتوه بيتكلم وشاف وحدة واقفة بس ماعطته ظهرها .. سكت وظل يطالع ..(أحمد معروف بسوالفه وسوابقه مع البنات) شاف أمه تشبب البنت ..والبنت ميتة ضحك من شكل أمه وهي خايفة عليها من الحسد ..وهو يسمع ضحكتها خلاص ما تحمل ..يبي يشوف شكلها وأمنيته استجابت لأنه أمه خذت الشبة وراحت دخلت المطبخ اللي يصير من الجهة الثانية ..والبنت صارت تمشي بصوبه .. كان يبي يشوف ملامحها عدل ..رجع على ورى وكأنه مايدري بشي وهي بفستانها ومكياجها وشعرها اللي مسويته كيرلي .. تمشى وأبد مو في بالها موقف مثل هذا .. مرت من قدامه وما انتبهت له في الممر لأنه كان ظلام شوي وهو استند على الجدار.. لكنه قدر يشوفها بشكل واضح لما مسك يدها وسحبها ..وهي كانت منصدمة توها بتصارخ الا وتسمع واحد يقول ليلووو شهالحلاوة <<يستعبط الأخ
البنت قفطت .. ونزلت راسها وقالت أنا مو ليلى ممكن تترك يدي ..ويوم سمع الصوت عرفها ..هذي هي نفسها ..فاطمة ..أو فطووووم هذي هي .. ياااه وينها كل هالمدة .. معقولة هالسنين غيرتها جذي!! بس لا ما تغيرت ملامح البراءة اللي بوجهها هي نفسها ..أحمد ماحب يحرجها أكثر من ماهي منحرجة .. واستغل انها ما تشوف لؤي وايد وانه المكان ظلام وشكله مو واضح وقال آسف أختي بس حسبتج ليلى وترك يدها وقال أنتي فاطمة صح؟ ماردت عليه وقالها انا لؤي <<<حركة نذالة منه صح؟
وعلى هالذكرى السريعة اللي مرت عليه مثل لمح البصر ..صحاه محمد وهو يقوله
محمد : يوووووووووووووه الحين أنت يوم إنك مو ناوي ترد علي وناوي تضيع في عالم ثاني .. زين يا أخي متصل ليش؟؟؟
أحمد : ههههههههههه اسمح لي ..بس والله تراني معذور ..
محمد :: اللي واخد عقلك
أحمد : يتهنا به
ضحكوا الاثنين واتفقوا انهم يشوفون بعض في الجامعة ويتلاقون في نفس المكان .. في الكافيتيريا ...
snow white
12-04-2006, 22:06
محمد من بعد ما خلص التلفون مع أحمد راح الصالة وصبح على الكل وحب راس والدينه وقعدوا يتريقون ..الكل كان موجود ماعدا فاطمة ...
فاطمة : ألـــــــــــو فديت هالصوت أنا ..
غفران : هههههههههه فديتج والله ..لا تتفديني تراني أستحي..بس تعالي اليوم اشفيج تأخرتي في الاتصال مو عوايدج؟
فاطمة : أقول شرايج تغني لي بعد اغنية حبيب قلبي رشوووووود تأخرتي
غفورة: هههههههههههههه لا لا بس استغربت شوي
فطوم : أي ايه قوليها هههه تعودتي على صوتي وماتقدرين تبدأين يومج الا به
غفور: ههههههههههه أي صح صح لا فعلا أي أوافقج في النظرية هذي.. لأنه تدرين الاقتراح اللي قبله
قاطعتها فطوم : ههههههههههه بس بس بتبدأ مشوار الاستهبال الحين ..أنا شيفكني من لسانج انتي !!
غفور : ولا شي ..ليش عندج مانع؟
فطوم : لا أبد ماعندي .. بس لحظة بشوف بمخباتي كأنه كأنه عندي دواس
غفور : هههههههههههههه ايواا عاشوااا عفية على اللي يتعلمون خفة الدم مني .. بس لا تحاولين لأنج ما بتنجحين .. خفة الدم هذي شي يمشي بعروقي
فطوم : أقول أكرميني بسكوتج بس.. وأكدي لي الجدول
غفور : أنا أبي أفهم أنتي شنو اللي في بالج وشاغله لدرجة انج مو قادرة تحفظين هالجدول؟؟ انا تراني حتى الحصص حفظتها وبالترتيب ومع التبديلات المحتملة بعد
فطوم : اااااااااه والله تبين الصج .. تراني مو متصلة للجدول .. بس مضايقة وماحبيت أطلع على الأهل بهالشكل .. قلت مالي الا بلسم جروحي
غفور : العن أبو التصرييفة ...هههههههه بس ترا الحين مو وقتج كلش...
فطوم : ليش؟ اييه لا تقولين تريقوا عنج والحين انتي قالبة البيت عليهم لأنه تأثير الاضطراب المعدي بدأ يظهر
غفور: هههههههه قومي انقلعي بس.. تذكرين بحث معلمة ابتسام؟؟ اللي اليوم آخر يوم له
فطوم : اييه اللي سلمته امس.. بس أنا يعني عندي احساس انه هالمعلمة كانوا ناوين يسمونها باسم مشتق من اسم غضبان مثل غضبانة ...والله الاسم ما يركب مو لايق عليها ... عكس وجهها تماما
غفور: ههههههههههه ايه والله ..ولهذا السبب انا شايلة هم التهزيئة المحترمة
فطوم : افا ليش؟
غفور : بحثي .. سالفته بقولج اياها بعدين ..بس الحين متورطة ومو قادرة اصرف روحي ..وهو مو محفوظ عندي مادري شسوي
فطوم : احم احم لقيت لج الحل .. أنا مثل ما تدرين كنت مسوية اثنين.. واحد لي وواحد لبنت عمي تطوعا لها وحبا فيها
غفور : ايييييييه شلون راحت عن بالي
فطوم : خخخخخخخ الموهم روحي صممي الغلاف وانا الحين أطبعه وبعدها بطلع على المدرسة على طول
غفوور: تسلمييين والله.. وأخيرا رجعت لطبيعتي ... تعرفيني أكره الحزن لدرجة فظيعة ..فطوم والله ماكو على جو الوناسة والضحك
فطوم: ههههههههههههههه يمكن بالنسبة لج ..على العموم يلا سي يو عشان ما اتأخر
غفوور : سي يو تو ياعمري
الساعة 2 الظهر ...يعني الكل وصل بيته ..وخلص صلاته ويمكن غداه بعد ...وفي هذا الوقت ..فاطمة كانت في غرفتها ..تتذكر كلام بنت عمها معاها اليوم
في وقت البريك ..كانت فطوم حاسة إنها ما تقدر تصبر أكثر .. ومحتاجة تشارك الأفكار والذكريات اللي رجعت لها مع أغلى الناس فقلبها وأقربهم ..مع الإنسانة اللي فاهمتها وعارفتها ..مع اللي ما تخبي عنها ولو شي بسيط وتافه ..ولا حتى موقف يصير لها مهما كان ..بنت عمها ..اللي تحبها من كل قلبها ..والمشاعر اللي فقلبها لها تتجاوز كل معاني الحب وتتعداه ..بإختصار نقدر نقول إنه بنت عمها ..ولاء هي الوحيدة اللي ممكن قلب فطوم ينفتح لها وبكل صدق وحب...
على كثر ما تمنوا إلا إنه الحظ والأمنيات ما حققت مرادهم ..ألا وهو إنهم يكونون في صف واحد .. لكن هالشي ما أثر أبدا على علاقتهم ببعض..ولحسن الحظ إنه صف ولاء يقابل صف فطوم يعني ثانيتين أو ثلاث إلا هي عندها ..بدون أي إحساس أو وعي منها ..من سمعت الجرس شالت روحها وعلى طول طلعت وراحت فتحت باب صف بنت عمها ونادتها ..وولاء ما عطلت ...راحت لها على طول
فطوم: ولوي حبيبتي ...شخبارج؟
ولاء: ههههههه بالضبط نفس أخباري قبل 45 دقيقة بالضبط
فطوم : هههههه زين يلا بسرعة عشان اليوم ابي نمشي بروحنا
ولاء : ليش؟ مو ناوية تروحين مع البنات ؟؟ لايكون ردوا زعلوج بعد؟
فطوم : لا لا بس ابيج بموضوع يلا بسرعة أنا بروح أشتري الأكل على ما تخلصين .. أذكر عندج سؤال تبين تنقلين حله من اللي يمج ..كتبيه والحقيني اوكي؟
ولاء : اوكي ات از سو بيرفكت
فطوم : الله على بنت ميري وجاك
ولاء : هههههههه ايه عيل شعبالج ؟
فطوم : ولا شي يلا سي يو
ولاء : سي يو
بعد عشر دقايق التقوا عند الدرج..وابتدوا يمشون ..أو بالأحرى ابتدت فاطمة تقول كل شي وكل اللي صار بحذافيره وشرحت كل مشاعرها وأفكارها ..يعني بإختصار كأنها عاشت الوضع مع ولاء
وبعد خبرتها عن خالها حسن ..وعن خوفها واحساسها انه فيه شي وخوفها عليه..
ولاء : أنتي بس تطمني وريحي بالج وما بيصير إلا كل خير ...إذا عن موضوع أحمد فسبحان الله تصير للواحد وايد إنه تجيه ذكرى فجأة وتلخبط كيانه ..لكن صدقيني مالها أي معنى ..وإذا عن خالج ان شاء الله كل خير .. بس احنا ليش نستبق الأحداث.. هو اليوم بيكلمج وبتطلعون بعد شتبين أكثر؟
فطوم : أبي سلامته يا ولاء .. أبي راحته وراحت باله..
ولاء : وان شاء الله هذا اللي بيصير .. تعالي بس تعالي خلينا نروح للبنات ..نظراتهم بتحرقنا ..
فطوم : ايه وانتي الصادقة ..خلينا نروح نطفي الشرار أحسن
ويوم وصلوا ...
فطوم + ولاء : السلااااااااااااااااام
غفران : صباح الخير .. أقول جان كملتوا استكشافكم على المدرسة
الكل : هههههههههه
فطوم : فدييت الغيورة أنا .. بس صراحة ما لج حق تغارين من هذي أم كشة (ولاء معروف عنها إنها تحب تهتم بشعرها وتحبه دوم يطلع حلو)
ولاء : ليش اشفيه شعري .. وصارت بشكل هستيري تمسح عليه وتحاول تعدله ..
ولاء : صج يعني من صجكم كشة؟؟
فطوم : لااا لا وربي لا بس كنت امزح
عهود : ما تسوى عليج هالمزحة
ولاء : هههه والله بايخين وما عندكم سالفة ...يعني تطنزون هاا؟
فطوم : ماااااااعاااش من يسويها ..مع اني الظاهر اقصد روحي بس يلا بعد راضية
الكل : هههههههههه
وعلى هالحال انتهى البريك بضحك ووناسة ..الا فاطمة اللي على ضحكها ومزاحها .. ما كانت متطمنة أو مرتاحة ..وعندها احساس غريب إنه حالها بيتغير وبيتبدل .. وإنه مافيه شي بيبقى على حاله ...وعلى نفس اللحظة ..تلفونها رن ..هالرنة مميزة ..تعرف هالموسيقى ..الغيتار ..نغمة هي وحسن يموتون عليها ..وحاطتها كنغمة له خاصة فيه تميزه بها...
فطوم : الــــــــــــــــــــو .... خالي يالدب جان ما اتصلت
حسن : ههههههههه يعني في عمري وفي حياتي كلها لا شفت ولا بشوف وحدة مثلج ..يا سودة الوجه خالج وتقولين له يالدب ...
فطوم : لا عيل تبيني أقول يالرشيق ولا يالغالي ولا حبيبي؟؟
حسن : وليش لا شالمانع؟
فطوم :: لأنهم محجوزين ...لشريك المستقبل
حسن : هههههههههه الله يعينه
فطوم : عفوا؟؟
حسن : أقصد يابخته
فطوم : اييه خلك جذي ..سنع كلامك
حسن : لا حووووووووووول ردينا!!
فطوم :هههههههههه لا لا خلاص بس امزح يؤؤ اشفيك ما تشد المزاح
حسن : لا بلى أشده كل أنواع المزاح والهرج والخبل إلا مزاحج اووف يا كرهي له
فطوم وابتدت تتكلم بجدية : طيب الحين خل هالهرج على صوب وقولي .. اشفيك؟
حسن : لا ماما فتوم ما فيني ثي
فطوم :: تتطنز حضرتك؟؟
حسن : هههههههههههههههههههههه تدرين عاد احلى عليج العصبية
فطوم : والله كل الاحوال حلوة علي .. ويلا لا تغير الموضوع قولي اشفيك..
حسن : الشغل ..الشغل يا فطيم مو مخليني أتنفس .. خنقني ..ما فيني حيل أتحمل أكثر..
فطوم : خير عسى ما شر شصاير؟؟ مع إنك يوم أخترته من بين باقي العروض اخترته بقناعة وأنا بنفسي تأكدت انك مقتنع من كلامك ..انك ماراح تترك أحد يأثر عليك..!!
حسن : ايه لكن ..المسألة مختلفة تماما عن اللي في بالج...
فطوم : عيل شصاير شسالفة؟؟؟ فهمني؟
حسن : أنا مضطر أسافر عشان الشغل...
فطوم : وهذي مواول مرة يا خالي تس......كانت بتكمل كلامها وتقول إنها مو اول مرة يسافر عشان شغل ..بس استوعبت الحين المسألة ...وكملت ..
فطوم : خالي ... توصل المدة سنين؟
حسن : هذا على أقل تقدير
فطوم : وبتوافق؟
حسن : محتار ..فرصة عمر ..وضربة حظ ما تتفوت
فطوم : عيل توكل على الله
حسن : زين ..بس شلون ؟؟ شلون أعيد الحالة .. أنا كنت مغترب من دونكم.. ويوم رجعت وأخيرا حسيت بإني إنسان عايش وسط ناس أحبهم ويحبوني.
فطوم : خالي ..إحنا عيال اليوم .. والسفرة ذيك .. انساها ...لا مجال للمقارنة ..أنت سافرت واغتربت لأنك كنت تبي تعيش في مكان غير .. في جو غير .. كنت مقتنع كل القناعة إنه السفر هو اللي بيضمن لك مستقبل ناجح لكن...
حسن : لكن رغم نجاحي .. رجعت .. وما قدرت اكمل بعيد عنكم..كنت مخنوق ومحتاجكم
فطوم : اللي يريحك سوه .. ولاتشيل همنا ..انت عارف انه كلنا معاك مهما كان قرارك ..
حسن : هذا رايج؟
فطوم : وراي الكل وأنا متأكدة
حسن : زين الحين خلينا من هالمسألة ..تراني أبي أعوض عن أمس .. ما استانست كلش .. يلا قومي اجهزي ..بنروح الحين فيلم عشان نلحق نطلع من وقت .. وبعدين نروح على البحر شوي ..وعدتج من زمان إني بوديج ..لكن ما وفيت ..اليوم ما وراي شي.. بوديج وبعدها بنتعشى ونرجع...
فطوم : ياااااااااااااااااااااااااااي هالمشوار روعة رااااااااااااائع أنت أحسن خال في الدنيا كلها
حسن : ههههههههههه زين انا اراويج بعلم عليج
فطوم : لا لا افااا أهون عليك؟؟
حسن : وعشرة فوقج بعد..ئال ايه ئال أهون ئال <<<بالمصري
فطوم : هههههههههه طيب يلا قوم اقلب وجهك أنا بأجهز وأرد عليك .. ويستحسن إنك تجي من الحين وتنقع برا تنتظرني ..بدون ما تقولهم عن المخطط ولا بيرزون الفيس ..
حسن : ههههههههههههههههههههههه انا اراويج ..والله انه ما فيج خير
فطوم : طالعة على خالي ...مع السلاامة
حسن : ههههههه مع السلامة
-------------------------------------------------
نهاية الجزء الثاني ...وانتظروا معاي الجزء الثالث بأحداثه ..في أقرب فرصة راح أنزله لكم واعذروني الحين لكني ك